Səhiyyə Nazirliyinin sabiq vəzifəliləri – İnsan resursları, elm və təhsil şöbəsinin müdiri Səidə Rüstəmova, şöbənin sabiq baş mütəxəssisi Ruhiyyə Məhərrəmova və İctimai Səhiyyə və İslahatlar Mərkəzinin sabiq şöbə müdiri Lətafət Cabbarovanın cinayət işi üzrə məhkəmənin növbəti iclası keçirilib.
Apa.az xəbər verir ki, Bakı Ağır Cinayətlər Məhkəməsində Mahirə Kərimovanın sədrliyi ilə keçirilən prosesdə Səidə Rüstəmovanın vəkili vəsatətlə çıxış edərək məlumatların yayılmasının qarşısını almaq məqsədilə jurnalistlərin prosesdə iştirak etməməsini məhkəmədən xahiş edib. Ancaq məhkəmə vəsatəti təmin etməyib.
Ruhiyyə Məhərrəmovanın ev dustaqlığının müddətinin dəyişdirilməsi ilə bağlı vəsatət də rədd edilib. Dövlət ittihamçısı Babaxan Həsənəliyev ittiham aktını elan edib, davamı növbəti iclasda oxunacaq. Proses dekabrın 4-nə təyin olunub.
İstintaq materiallarına əsasən, Səidə Rüstəmova və digərləri həkimlərin sertifikasiya imtahanlarına qanunsuz buraxılması, saxta sertifikatların verilməsi və bu işlər müqabilində rüşvət almaqda ittiham olunurlar. Onlara qarşı Cinayət Məcəlləsinin rüşvət alma, vəzifə səlahiyyətlərindən sui-istifadə, vəzifə saxtakarlığı, nüfuz alveri və çirkli pulların leqallaşdırılması maddələri ilə ittiham irəli sürülüb.
Hazırda təqsirləndirilən şəxslər ev dustaqlığındadır, iş üzrə digər iştirakçılarla bağlı istintaq davam edir.
