Bakıda “şəxsi” avtovağzal bağlanıb. Bu barədə BakuPlus.az Qaynarinfo-ya istinadən bu gün, 10 dekabr tarixində məlumat verir.
"Binə” ticarət mərkəzində müxtəlif rayonlardan gəlmiş sərnişin avtobuslarının mərkəzin ərazisinə daxil olaraq oradan yenidən sərnişinləri toplayıb müxtəlif ünvanlara çatdırmaqla qanunsuz sərnişindaşıma fəaliyyəti ilə məşğul olmaları müəyyən edilib. Bir sıra nəqliyyat vasitələrinə Şirvan şəhər avtovağzalından verilmiş arayışda da təyinat nöqtəsinin "Binə” ticarət mərkəzi olduğu qeyd olunub.
O da məlum olub ki, "Binə” ticarət mərkəzindən kənarda saxlayan sürücülərin sərnişindaşıma fəaliyyətinə mane olurlar. Onlara yalnız yüksək "yer haqqı” ödəməklə ticarət mərkəzinin daxilində fəaliyyət göstərməyə icazə verilir.
"Binə” ticarət mərkəzi ərazisində sərnişindaşıma fəaliyyəti göstərən avtobuslara nəzarət edən Ağa adlı şəxsdən xeyli sayda sürücü dövlət qurumlarına şikayət ərizəsi ünvanlayıb. Artıq Azərbaycan Yerüstü Nəqliyyat Agentliyinin əməkdaşları sözügedən avtovağzalın fəaliyyətinin dayandırılması üçün iş aparırlar.
Agentliyin vəzifəli şəxsi bildirib ki, hazırda da müxtəlif rayonlardan gəlmiş sərnişin avtobusları "Binə” ticarət mərkəzinin ərazisinə daxil olmaqla öz qanunsuz fəaliyyətlərini davam etdirir. Həmin əraziyə daxil olmaq üçün ancaq müvafiq nəzarət-buraxılış məntəqəsindən keçmək mümkündür.
"Binə” ticarət mərkəzi ərazisində icazə olmadan avtovağzal (avtostansiya) fəaliyyəti ilə məşğul olduğu müəyyən edildiyindən, MMC barəsində İnzibati Xətalar Məcəlləsinin 325.1-ci maddəsinə əsasən, 1 sentyabrda protokol da tərtib edilib.
Məhkəmənin qərarı ilə "Arazaviya" MMC İnzibati Xətalar Məcəlləsinin 325.1-ci maddəsində nəzərdə tutulmuş inzibati xətanı törətməkdə təqsirli bilinərək 1500 manat məbləğində cərimə edilib.
