Kənd Təsərrüfatı Nazirliyinin baytarlıq klinikası son 1 ildir ki, müxtəlif ev heyvanlarına kompleks xidmətlər göstərir. Müəssisədə ilkin müayinədən tutmuş ən çətin cərrahiyə əməliyyatlarının aparılması üçün lazımi şərait yaradılıb. Klinika haqda bu gün, 30 noyabr tarixində İctimai TV reportaj hazırlayıb.
Klinikada çalışan 20-yə yaxın mütəxəssisin əksəriyyəti elə baytarlıq elmi-tədqiqat institutunun işçiləridir. Burada, eyni zamanda heyvanların orqanizmində gedən hər hansı gizli prosesləri müəyyən etmək üçün ixtisaslaşmış laboratoriya fəaliyyət göstərir. Əməliyyatdan çıxmış it və pişiklərin stasionar qaydada müalicəsi üçün də şərait yaradılıb.
Həmçinin klinikanın mütəxəssisləri təsərrüfatlarda iri heyvanları müayinə etmək üçün səfərlər edirlər.
Bəzən heyvanlar çox ciddi zədələr ücbatından müəyyən orqanlarını itirir. Sila adlı it ön ayaqlarını itirib, amma buna baxmayaraq, həkimlərin xüsusi müdaxiləsindən sonra o, həyatdadır və tezliklə öz yeni arabasına qovuşaraq yeriməyini bərpa edəcək.
Heyvan sahiblərinin bəzən müəyyən səbəbdən öz kiçik dostları ilə səfər etməsi çətinlik yaratdığından heyvanlarını etibarlı əllərə vermək məcburiyyəti yaranır. Elə bu səbəbdən də heyvan hotelləri də fəaliyyət göstərir. Burada onların yemlənməsi, gəzdirilməsi və hətta kosmetik qulluğu mümkündür.
[URIS id=81210]
