Paytaxtın Nizami rayonu, Keşlə qəsəbəsi, Əzim Əzimzadə küçəsində evlərin qapıları birbaşa avtomobil yoluna açılır. Bu haqda bu gün, 1 mart tarixində Bakuplus.az Real TV-yə istinadən xəbər verir.
Adıçəkilən ərazidə sakinlər 10 m aralıda duran parka keçməkdə belə çətinlik çəkirlər. Çünki avtomobil yolu dardır, nəqliyyat vasitələri isə buradan sürətlə keçir. Hətta iritonnajlı maşınlar belə sürəti azaltmaq istəmir.
“Burada 30 metr uzunluğunda TIR-lar keçir. Neçə dəfə bizim avtomobilləri, qapıları və dirəkləri əzib. Buradan qaz borusu keçir. Bir gün o borunu zədələyəcəklər, faciə baş verəcək”, - deyə sakinlər şikayət edirlər.
Onların sözlərinə görə, pik vaxtlarda küçə boyunca saatlarla tıxac da yaranır.
Sakinlər problemi “Keşlə” dəmir yolu stansiyasının yaxınlığı, Mirzə Ələkbər Sabir küçəsində inşa olunan avtomobil tunelində görürlər. Belə ki, əvvəllər M.Ə.Sabir küçəsi geniş olub və avtomobillə rahat hərəkət mümkün idi. İndi isə yol əhəmiyyətli dərəcədə daralıb və maşın axınına tab gətirmir. Bu səbəbdən də avtomobillər məhəllələrdən hərəkət etməyə məcbur olurlar.
Bakı Nəqliyyat Agentliyi məsələ ilə bağlı araşdırma aparacağını və müvafiq addımların atılacağını bildirib.
