Kliniki Tibbi Mərkəzin mətbuat xidməti elektrik enerjisinin kəsilməsi ilə bağlı öz Facebook səhifəsində məlumat paylaşıb.
"Bu gün saat 11:30 radələrində Kliniki Tibbi Mərkəzi elektirik enerjisi ilə təmin edən yüksək gərginlikli hava xəttində açılma baş verib və elektrik enerjisi təxminən 10 dəqiqə sonra, saat 11:40-da tam bərpa olunub", - məlumatda deyilir.
Məlumatda qeyd olunur ki, mərkəzin bütün şöbə və ya binalarında elektrik enerjisinin olmaması ilə bağlı yayılan məlumatlar əsassızdır: "Kliniki Tibbi Mərkəzin ümumilikdə 5 ədəd elektrik generatoru var və həmin zaman onlardan yalnız biri işə düşməyib. Bu da Mərkəzin Poliklinika şöbəsinin işinə təsir edib. Ağır xəstələrin olduğu digər şöbə və bölmələrdə elektrik enerjisinin verilişində problem yaşanmayıb. Bir daha bildiririk ki, elektrik enerjisinin verlişində baş verən qısa fasiləli problem Kliniki Tibbi Mərkəzin fəaliyyətinə, mərkəzdə olan ağır xəstələrin vəziyyətinə heç bir təsir etməyib".
