“Location” gecə klubunun rəhbərlərinin məhkəməsi davam edir. Bu haqda bu gün, 30 avqust tarixində Bakuplus.az Apa-ya istinadən xəbər verir.
Proses zamanı dindirilən Nigeriya vətəndaşı Momodu Fatimah Semira “MedEra” hospitalından şikayətçi olduğunu bildirib.
“Əllərim hələ də işləmir, ayaqlarım zədəlidir. Mənə ağrıkəsici verib saxlayırdılar. Xəsarət alanlardan ən çox mənə pul xərclənib deyirlər, amma nəticə göz qabağındadır”, - deyə o vurğulayıb.
Klubun rəhbəri, təqsirləndirilən Orxan Səfərovun vəkili də tibb müəssisəsindən narazı olduğunu əlavə edib.
“Fatimah Semiranın müalicəsi üçün bu günə qədər 58.000 AZN xərcləmişik. “MedEra”da 21.000 AZN pul xərclədikdən sonra bir nəticə olmadığı üçün zərərçəkmişi başqa klinikaya apardıq,” - deyə o, qeyd edib.
Əcnəbi vətəndaş isə müalicəsi bitdikdən sonra Nigeriyaya bilet alınmasını tələb edib.
Daha sonra bloger Aysel Şükürova və bir neçə zərərçəkmiş şəxs şikayətlərinin olmadığını bildirərək məhkəməyə gəlməkdən imtina etdikləri elan edilib.
Növbəti iclas 5 sentyabr tarixində baş tutacaq.
3 aprel 2022-ci il tarixində “Location Baku” gecə klubunda partlayış baş vermişdir. Nəticədə 4 nəfər ölmüş, 34 nəfər xəsarət almışdır.
