6 sentyabr kompüter alimi, süni zəka tətqiqatçısı, qeyri-səlis məntiq nəzəriyyəsinin yaradıcılarından biri Lütfi Zadənin anım günüdür.
O, 4 fevral 1921-ci ildə Bakının Novxanı kəndində, Rəhim Ələsgərzadə və yəhudi əsilli rus uşaq həkimi olan Feyqa (Fanya) Moiseyevna Koremanın ailəsində dünyaya gəlib.
Dünya şöhrətli alim üçüncü sinfədək təhsilini Bakıda alıb, daha sonra o, ailəsi ilə birgə Tehrana köçüb.
1942-ci ildə Tehran Universitetindən məzun olub. Bundan bir il sonra ABŞ-yə köçüb.
1944-cü ildə Massaçusets Texnologiya İnstitutuna daxil olub. 1946-cı ildə Kolumbiya Universitetində doktorluq dərəcəsi üzrə tələbə kimi təhsil alıb. 1959-cu ilə qədər ABŞ-də MIT və Kolumbiya Universitetində magistr, doktorluq elmi dərəcələri alıb, professor kimi fəaliyyət göstərib. 1959-cu ildən ömrünün sonunadək Kliforniyadakı Berkeley Universitetində dərs deyib.
Lütfi Zadə "Təəssüratlar nəzəriyyəsi", "Sistemlər nəzəriyyəsi", "Sözlə işləyən kompüter nəzəriyyəsi", "Optimal süzgəclər nəzəriyyəsi", "Soft kompyutinq" kimi nəzəriyyələrin müəllifidir.
O, məhşurlaşmasına səbəb olan qeyri-səlis məntiq nəzəriyyəsini 1973-cü ildə iləri sürüb. Qeyri-səlis məntiq nəzəriyyəsi – riyaziyyatın bir bölməsi olub klassik məntiq və çoxluq anlayışlarını ümumiləşdirir.
Alim 1989-cu ildə qeyri-səlis məntiq nəzəriyyəsinin sənayedə qazandığı uğurlarına görə Yaponiya tərəfindən elm adamlarına verilən ən yüksək mükafat – "Honda" mükafatı ilə təltif olunub.
Lütfi Zadə 6 sentyabr 2017-ci ildə ABŞ-nin Kaliforniya ştatında 96 yaşında dünyasını dəyişib.
Dünya şöhrətli alim I Fəxri Xiyabanda dəfn olunub.
