Məktəb-Lisey Kompleksinin 7-ci sinifində oxuyan övladının fiziki təzyiqə məruz qalması barədə valideynin sosial şəbəkədə yaydığı məlumat məktəb rəhbərliyi tərəfindən araşdırılıb. Bu haqda bu gün, 28 dekabr tarixində APA məlumat verib.
Təhsil müəssisəsindən verilən məlumata görə, 27 dekabr 2022-ci il tarixində məktəbdə VII və IX siniflər (riyaziyyat, tədris dili, ingilis dili) üzrə monitorinq təşkil olunub. Monitorinq zamanı qeyri-ixtisas müəllimləri nəzarətçi qismində prosesə cəlb ediliblər.
“Qeyd olunan sinfin şagirdləri digər siniflərdə monitorinqin bitdiyini əsas gətirərək müəllimdən prosesi sonlandırmasını istəyiblər. Müəllim sual kitabçalarını toplayıb dəhlizə çıxıb. Sonra digər sənədlərin sinifdə qaldığını xatırlayaraq geri qayıdan zaman sürətlə sinfi tərk edən şagird qapıda onunla toqquşub və sual kitabçaları məktəblinin üzünə toxunub. Müəllim şagirdin zədə almadığını müəyyən edib və evə yola salıb.
Bu gün məktəb rəhbərliyi tərəfindən şagirdlə söhbət aparılıb və valideyni məktəbə dəvət olunub”, - təhsil müəssisəsindən bildirilib.
