"Bilirsiniz ki, hazırda teatrımız yay tətilindədir. Hələlik gözləyirəm. AzDRAMA-da yaşadıqlarım səbəbindən əsəb, gərginlik və stress keçirdim. Hələ də özümə tam gələ bilməmişəm".
Bu sözləri Əməkdar artist Mehriban Xanlarova Bakuplus.az-a açıqlamasında deyib.
Bir müddət əvvəl yaşadığı qalmaqaldan sonra çalışdığı Akademik Milli Dram Teatrından ayrılan Əməkdar artist Mehriban Xanlarova yenidən teatra bərpa olunması ilə bağlı sosial şəbəkə hesabında dəfələrlə videomüraciət etmişdi.
Aktrisa saytımıza açıqlamasında bildirib ki, məsələ öz həllini tapmayana qədər susmayacaq: "Yenidən teatra bərpa olunacağımı gözləyirəm. Göydə Allahıma, yerdə isə dövlətimə güvənirəm. Bir müddət özümə sakitlik vermişəm. Bəlkə də bəzi insanlar düşünür ki, kimlərsə Mehriban Xanlarovanı susdurub. Xeyr, əsla belə deyil. Mən susmamışam və susmaq fikrim də yoxdur. Bu işin sonuna qədər gedəcəyəm. Heç kim məni yolumdan döndərə bilməyəcək. Allahdan başqa heç kimdən qorxmuram, çəkinmirəm. İnşallah, ümid edirəm ki, hər şey yaxşı olacaq və 27 ildən çox çalışdığım AzDRAMA-ya yenidən bərpa olunacağam".
