Abşeron rayonunun Məmmədli qəsəbəsində yolun yararsız vəziyyətdə olması səbəbindən sakinlər ictimai nəqliyyatdan istifadə edə bilmirlər.
Oxu.az-a daxil olan şikayətdə bildirilir ki, 217 nömrəli marşrut avtobusu kəndin içinə daxil olmur.
"İctimai nəqliyyatdan istifadə imkanlarımız məhdudlaşdırılıb. Avtobusun kənd ərazisinə daxil olmaması, xüsusilə yaşlıların, məktəblilərin və işə gedib-gələn kənd camaatının hərəkətində ciddi çətinliklər yaradır", - deyə şikayətdə bildirilir.
Məsələ ilə bağlı "BakuBus" MMC-nin mətbuat katibi Əsmər Əliyeva bildirib ki, Məmmədli qəsəbəsi yolunda mövcud olan əlverişsiz hərəkət şəraiti nəzərə alınaraq, sərnişindaşımanın təhlükəsizliyini təmin etmək məqsədilə 217 nömrəli marşrut xəttinin hərəkətində müvəqqəti dəyişiklik olunub.
"Yenilənmiş sxemə uyğun olaraq, avtobusların hərəkəti aşağıdakı qaydada təşkil olunur. Metronun "Koroğlu" stansiyası istiqamətindən səfərə başlayan avtobuslar Kürdəxanı yolu ilə düz hərəkət edərək Pirşağı-Böyükşor yolundakı dairədən geridönüş edir, Pirşağı yolu ilə düz gəlib sağa dönərək Məmmədli yoluna daxil olurlar. Məmmədli qəsəbəsi istiqamətindən (əks istiqamət) səfərə başlayan avtobuslar isə "Yanardağ" şadlıq sarayına qədər hərəkət edir, daha sonra geridönüş edərək Məmmədli yolundan Pirşağı yoluna daxil olur və Kürdəxanı yolu istiqamətində hərəkəti davam etdirirlər. Yol infrastrukturundakı vəziyyətlə bağlı tətbiq olunacaq dəyişikliklər barədə ətraflı məlumatlar "BakuBus Official" "Telegram" kanalında operativ şəkildə paylaşılır. Əlavə olaraq bildiririk ki, qeyd olunan yolun mövcud vəziyyətinin yaxşılaşdırılması və təmiri "BakuBus" MMC-nin səlahiyyətlərinə daxil olmadığından, məsələ ilə bağlı aidiyyəti quruma müraciət etməyiniz xahiş olunur", - deyə Ə.Əliyeva bildirib.
