Altı Azərbaycan şəhəri 5 milyon avro dəyərində layihələr üzrə dəstək alacaq.
Bakuplus.аz xəbər verir ki, "Merlər Razılaşması" çərçivəsində Azərbaycanda bələdiyyələr üçün ümumi dəyəri 5 milyon avro olan layihələr həyata keçiriləcək.
Bu barədə "Merlər Razılaşması – Şərq Tərəfdaşlığı" təşəbbüsünün yerli dayanıqlı inkişaf üzrə koordinatoru Maksim Vereşak bildirib.
Onun sözlərinə görə, "Merlər Razılaşması" çərçivəsində Azərbaycanda altı bələdiyyəyə layihələrin hazırlanmasında dəstək göstərilir.
"Layihələri maliyyələşdirməyə hazır vəziyyətə gətirmək üçün yaşayış və ictimai binalarda enerji auditi apardıq. Nəticədə hazırda potensial investorlar üçün təqdim edə biləcəyimiz 11 bina üzrə 11 sənədimiz var. Bu layihələrin ümumi dəyəri 5 milyon avronu ötür", – deyə Maksim Vereşak qeyd edib.
O əlavə edib ki, sözügedən layihələr Xırdalan, Gəncə, Mingəçevir, Şəki, Yevlax və Şamaxı şəhərlərində həyata keçirilir.
