Metronun iş rejimi dəyişdiriləcək. Bu haqda bu gün, 18 yanvar tarixində Bakuplus.az Metropolitenə istinadən xəbər verir.
20 Yanvar faciəsinin ildönümü ilə əlaqədar həmin gün metronun “20 Yanvar”, eləcə də “İçərişəhər” və “Elmlər Akademiyası” stansiyalarında gücləndirilmiş iş rejimi tətbiq olunacaq.
20 yanvar tarixinə keçən gecə “20 Yanvar” stansiyasının sütunlarına və şəhidlərin adlarının həkk olunduğu lövhələrin yerləşdiyi vestibül sahələrində divarlara qərənfil çələngləri asılacaq.
“20 Yanvar” stansiyasının platformasında metropoliten işçilərindən ibarət qarovul dəstəsi düzüləcək. Bütün stansiyalarda mərkəzləşmiş radio şəbəkəsi vasitəsilə günün ruhuna uyğun vətənpərvərlik mövzusunda musiqi parçaları səsləndiriləcək. Qatarlarda stansiyaların adlarını maşinistlər səsləndirəcəklər.
Saat 12:00-da şəhidlərin xatirəsi 1 dəqiqəlik sükutla yad ediləcək.
