Bu il fevralın 6-da "İdrak" liseyində müəllimini güllələyən 10-cu sinif şagirdi Əli Şirinovun atası Samir Şirinova hökm oxunub.
O, Cinayət Məcəlləsinin 230-cu maddəsi (odlu silahın diqqətsiz saxlanılması) ilə təqsirli bilinərək aylıq qazancının 20 faizi dövlət nəfinə tutulmaqla 2 il islah işləri cəzasına məhkum edilib.
Samir Şirinov ifadəsində bildirib ki, ov tüfəngini əvvəlcə seyfdə saxlayıb, lakin köhnə seyfi atdıqdan sonra silahı qarderob otağında ayaqqabı qutularının arxasında gizlədib. Onun sözlərinə görə, ailədə nişan hazırlığı getdiyi üçün qarderob otağı açıq qalıb və oğlu da həmin vaxt silahı götürüb.
Zərərçəkmiş müəllim Şəhla Kamilova bildirib ki, Əlidən heç vaxt aqressiya görməyib və bu hadisəni gözləməyib. O, boynundan yaralandığını, 22 qırmadan 6-sının hələ də bədənində qaldığını deyib. Müəllim məhkəmədə ailə ilə barışdığını və şikayətçi olmadığını da bildirib.
Əli Şirinov isə ifadəsində silahı sinif yoldaşlarına göstərmək üçün evdən götürdüyünü, sonradan qaytarmaq istəsə də buna imkan tapmadığını deyib. Onun sözlərinə görə, müəllimini qorxutmaq istəyib, lakin niyə belə etdiyini özü də tam izah edə bilmir. O, həmçinin müəllimin ona "sənin gələcəyin yoxdur" kimi sözlər dediyini iddia edib.
Qeyd edək ki, Əli Şirinovun müəllimini güllələməsi ilə bağlı cinayət işi üzrə məhkəmə prosesi hazırda davam edir.
mənbə: lent.аz
