Azərbaycan Dövlət Akademik Musiqili Teatrı 115-ci mövsümündə də teatrsevərlərin görüşünə maraqlı səhnə əsərləri ilə gələcək. Sənət ocağı mövsümün açılışına 18 Sentyabr – Üzeyir Musiqi Günündə dahi bəstəkarın “O olmasın, bu olsun” tamaşası ilə başlayacaq.
Bakuplus.az AZƏRTAC-a istinadən xəbər verir ki, teatrın yaradıcı heyəti qarşıdakı mövsümü daha maraqlı və yaddaqalan etmək üçün hazırlıqlara başlayıb. Mövsümə başladıqdan sonra 4 gün ardıcıl davam edəcək ənənəvi “Üzeyir Hacıbəyli həftəsi” çərçivəsində dahi bəstəkarın “Leyli və Məcnun” (quruluşçu rejissor və libretto müəllifi Samir Qulamov), “Ər və arvad” (quruluşçu rejissor Yusif Əkbərov), “Arşın mal alan” (quruluşçu rejissor Elvin Mirzəyev, bərpaçı rejissor Əhəd Hacıyev) tamaşaları da nümayiş olunacaq.
Bundan başqa, sentyabrın 22-də quruluşçu rejissoru Cavid İmamverdiyev olan “Nəğməmə inan”, 28-də rejissor Yusif Əkbərovun quruluş verdiyi “Qızıl toy”, 29-da isə Cavid İmamverdiyevin hazırladığı “Bəxtiyar” tamaşaları teatrsevərlərə təqdim ediləcək.
Bildirilib ki, hazırda rejissorlardan Elməddin Dadaşovun quruluşunda “Bir qalanın sirri”, İlham Namiq Kamalın quruluş verdiyi “Əliqulu evlənir”, Ər Toğrulun hazırladığı “Palata” və Zaur Əliyevin tərtibatında “Killerdən teleqram” tamaşalarının məşqləri gedir, premyeralara hazırlıq işləri görülür.
