Məşhur aparıcı Nigar Fərhadın əri Samir Yəhyazadə həbs edilib.
Həbs onun rəhbərlik etdiyi "AİD Group" xaricdə təhsil şirkəti ilə bağlıdır.
Hüquq-mühafizə orqanlarının ilkin araşdırması nəticəsində Samir Yəhyazadə Cinayət Məcəlləsinin külli miqdarda dələduzluq və vəzifə səlahiyyətlərindən sui-istifadə etmə maddələri ilə cinayət məsuliyyətinə cəlb edilib. Məhkəmənin qərarı ilə onun barəsində 3 aylıq həbs qətimkan tədbiri seçilib.
Qeyd edək ki, "AİD Group" xaricdə təhsil sahəsində fəaliyyət göstərən aparıcı şirkətlərdən biridir. Şirkətin təsisçisi Nigar Fərhad Harvard Universitetində təhsil aldığını bildirir. O, eyni zamanda müxtəlif televiziya kanallarında aparıcı kimi çalışıb və verilişlərində səsləndirdiyi bəzi fikirlərlə zaman-zaman ictimai müzakirələrin mərkəzində yer alıb. Həbs edilən Samir Yəhyazadə isə peşəkar İT mütəxəssisidir.
Mənbə: qafqazinfo.az
