Nəsimi rayonunda "ELMA" restoranının gecə saatlarında yaratdığı səs-küydən şikayət edən sakinlərin müraciəti əsasında polis tərəfindən tədbir görülüb.
Məsələ ilə bağlı Daxili İşlər Nazirliyinin Mətbuat Xidmətinin əməkdaşı, polis baş-leytenantı Elbrus İbrahimov Bakuplus.az-ın sorğusuna cavab olaraq bildirib ki, daxil olan müraciət əsasında araşdırma aparılıb:
"Araşdırma zamanı sakinlərin narahatlığına səbəb olan neqativ halın aradan qaldırılması məqsədilə polis əməkdaşları tərəfindən qanunvericiliyə uyğun tədbirlər görülüb. İaşə obyektinin icarədarı barəsində İnzibati Xətalar Məcəlləsinin müvafiq maddəsinə əsasən inzibati tənbeh tədbiri tətbiq edilib. Obyektin fəaliyyətinin qanunvericiliyin tələblərinə uyğun təşkil olunmasının, xüsusilə gecə saatlarında ictimai asayişin pozulmasına yol verilməməsinin vacibliyi icarədarın diqqətinə çatdırılıb. Həmçinin bildirilib ki, analoji halın təkrarlanacağı təqdirdə qanunvericiliyə uyğun olaraq daha ciddi məsuliyyət tədbirləri görüləcək.
Polis əməkdaşları tərəfindən ərazidə vəziyyət nəzarətdə saxlanılır və vətəndaşların haqlı narazılığına səbəb ola biləcək halların qarşısının alınması istiqamətində tədbirlər davam etdirilir".
***
Sakinlər Bakının Nəsimi rayonunda fəaliyyət göstərən "ELMA" restoranından şikayətçidir.
Bakuplus.az-a müraciət edən vətəndaş bildirir ki, İmran Qasımov küçəsi 10 ünvanında yaşayan sakinlər sözügedən restoranda gecə saatlarınadək yüksək səslə musiqi səsləndirilməsindən narazıdırlar.
Onların sözlərinə görə, yaşayış kompleksi qarşısında yerləşən restorandan gələn musiqi səsləri gecə saatlarında istirahətlərinə mane olur. Sakinlər məsələ ilə bağlı dəfələrlə aidiyyəti qurumlara müraciət etsələr də, problemin həll olunmadığını bildiriblər.
Onlar gecə saatlarında səs-küyə nəzarətin gücləndirilməsini və problemin aradan qaldırılmasını istəyirlər.
