Fövqəladə Hallar Nazirliyinin xidməti otağında intim videolar çəkən polkovnik Zaur Mirzəyevlə bağlı bir sıra təfərrüatlar məlum olub. Bu haqda bu gün, 15 dekabr tarixində KriminalQafqaz məlumat verib.
Verilən məlumata görə, Zaur Mirzəyev FHN-in Dövlət Yanğından Mühafizə Xidmətinin rəisi Füzuli Əsədovun əmisi qızı ilə evlidir. Füzuli Əsədov isə öz növbəsində keçmiş kənd təsərrüfatı naziri Heydər Əsədovun qardaşıdır.
2007-ci ildən Füzuli Əsədovun köməkçisi işləyən polkovnik qohumluq əlaqələrindən istifadə edərək idarənin əməkdaşları arasında öz təsirini açıq-aşkar nümayiş etdirib. Xidmət rəisi ilə qohumluq əlaqəsi olduğuna görə hamı Zaur Mirzəyevdən çəkinib.
Hazırda FHN-in sabiq işçisinin məhkəməsi başlayıb. O, Cinayət Məcəlləsinin “Şəxsi həyatın toxunulmazlığı vəzifəli şəxs tərəfindən öz qulluq mövqeyindən istifadə etməklə törədildikdə”, “Vəzifə səlahiyyətlərini aşma” və “Vəzifəli şəxsin qərarına qanunsuz təsir göstərmə-nüfuz alveri” maddələri ilə təqsirləndirilib. Cinayət işinə Bakı Ağır Cinayətlər Məhkəməsində baxılır.
