Səbail rayonu, Badamdar qəsəbəsində restorana girən oğru spirtli içki qəbul edərək orada yatıb. Bu haqda bu gün, 30 yanvar tarixində Bakuplus.az Qaynarinfo-ya istinadən xəbər verir.
33 yaşlı Rəşad Fərəcov (ad, soyad şərti) həmin restoranda bir ildən artıq ofisiant vəzifəsində işləyib. Restoranın sahibi ilə münasibətləri pisləşdiyi səbəbindən o, işdən azad edilib və qisas almaq üçün restorandan oğurluq etmək qərarına gəlib.
R.Fərəcov obyektin əsas giriş qapısının şüşəsini sındıraraq içəri daxil olub. Daha sonra spirtli içki qəbul etmək qərarına gəlib. Sərxoş vəziyyətdə müxtəlif əşyaları sellofan paketlərə yığandan sonra zalda yuxuya gedib. Səhər saatlarında restoranın işçiləri onu görərək, polisə müraciət ediblər.
Rəşad Fərəcov niyyətinin restoranda spirtli içki qəbul etməkdən ibarət olduğunu, əvvəlcədən oğurluq etməyi planlaşdırmadığını bildirib. O, əməlindən peşman olduğunu vurğulayıb.
Məhkəmənin hökmü ilə Rəşad Fərəcov 1 il 6 ay müddətinə azadlıqdan məhrum edilib.
