Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva tərəfindən elan edilmiş “Uşaq Hüquqları Aylığı” çərçivəsində dövlət uşaq müəssisələrində növbəti monitorinqlər keçirilib. Bu haqda bu gün, 25 noyabr tarixində Bakuplus.az APA-ya istinadən məlumat verir.
Yoxlama zamanı sağlamlıq imkanları məhdud uşaqlar üçün 4 nömrəli internat tipli xüsusi məktəbdə aparılmış monitorinq zamanı 1-3-cü siniflər istisna olmaqla, digər siniflərdə təhsil alan şagirdlər üçün dərsliklər, iş dəftərləri və metodiki vəsaitlərin təminatında çatışmazlıqlar aşkar olunub.
Həmçinin 8 nömrəli sanatoriya tipli internat məktəbində soyunub-geyinmə otaqlarında uşaqların dolablarının, vanna otaqlarının təmir edilməsinə ehtiyac olduğu müəyyən edilib.
Hər iki müəssisədə uşaqlarla konfidensial qaydada görüş keçirilib, onlara Ombudsmanın işi və uşaq hüquqları ilə bağlı məlumat verilib.
Ayrıca rəhbərliklə müzakirələr aparılıb, saxlanma şəraitinin yaxşılaşdırılması və uşaq hüquqlarının təmini məqsədilə tövsiyələr verilib.
