Paytaxt dükanlarında toyuq ətinin qiyməti artıb. Bu haqda bu gün, 17 fevral tarixində Bakuplus.az Xəzər Xəbər-ə istinadən məlumat verir.
Son bir neçə aydır toyuğun qiymətində 1-2 manat arasında artım müşahidə olunur.
Marketlərdən birinin sahibi Eldar Babayev bildirib ki, ətin qiyməti tədricən artır və bu, markalara görə dəyişir:
“Ayda 5 qəpik, 10 qəpik artım müşahidə olunur. Amma il ərzində 1-2 manat fərq edir. Əvvəl təzə toyuq 4 manat 50 qəpik olurdusa, hazırda 5 manat 70 qəpik olub. File bizdə əvvəllər 5 manat idi, indi 6-8 manat olub”.
İqdisatçı ekspert Xalid Kərimli isə deyir ki, son 7 ayda dünya bazarında ət məhsulları ucuzlaşır, ancaq ölkədə quş ətinin qiyməti baha olaraq qalır.
“Taxıl və toyuq yemində ciddi bahalaşma yoxdur. Buna görə də qiymətlərin bahalaşmasını hər hansı xərc artımı ilə izah etmək mümkün deyil. Qiymət artımı yalnız bu toyuqları istehsal edən şirkətlər tərəfindən həyata keçirilir”, – deyə ekspert vurğulayıb.
Həmçinin Xalid Kərimli əlavə edib ki, cari ilin iyul ayında qüvvəyə minəcək yeni qanundan sonra bazarda süni qiymət artımı edənlər cərimələnəcəklər.
