Bakıda son zamanlar sürüşmə zonaları bir qədər də aktivləşib. Qış aylarında yağıntının miqdarının kəskin artması sürüşməyə meyilli ərazilərdə təhlükəni bir qədər də artırır. Bununla bağlı Ekologiya və Təbii Sərvətlər Nazirliyi (ETSN) aidiyyəti qurumları vaxtında tədbir görməyə çağırıb. Bu haqda bu gün, 6 yanvar tarixində Bakuplus.az ATV-yə istinadən məlumat verir.
Mütəxəssislər deyirlər ki, təhlükənin qarşısını almaq üçün bənd bərkitmə işlərinin aparılması üçün su itkisinin azaldılması əsas şərtdir.
Milli geoloji kəşfiyyat xidmətinin rəisi Əli Əliyevin sözlərinə görə, Abşeron yarımadası ərazisində əsas sürüşmə zonaları Bayıl yamacı və Badamdar sahəsindədir. Bundan başqa, Qaraçuxur, Günəşli, Zığ-1, Masazır və Zəligölü sahələri də təhlükə altındadır. Sürüşmə sahələrində, eləcə də Qaraçuxur sürüşmə sahəsində bərpa işləri aparılır. Zığ-1, Günəşli, Masazır, Nübar massivlərinə gəlincə qeyd olunan sahələrdə hazırda heç bir tədbir görülmür.
Nazirliyin Milli geoloji kəşfiyyat xidmətinin mütəxəssislərinin apardıqları tədqiqatlara görə, mövsümdən irəli gələrək, lokal sürüşmə sahələrində aktivləşmənin artması qaçılmazdır.
Əli Əliyev: “Bu, əsasən, Nübar massivi və Zəligölü sahəsindədir. ETSN tərəfindən bu ərazilərdə davamlı mütəmadi monitorinq icra edilməkdədir. Və bəzi yerlərdə, xüsusilə Nübar massivinin Güzdək yamacında zəif və mürəkkəb müxtəlif istiqamətli çatların mövcüdluğunu qeydə almışıq və onların dinamikası davamlı nəzarətdə saxlanılır”.
