Paytaxt küçələrində avtobus zolaqları zəbt olunub. Bu haqda 2 mart tarixində Xəzərxəbər məlumat verib.
Paytaxt ərazisində avtobus zolaqlarının ən çox zəbt olunduğu ərazilərdən biri Babək prospektidir. Burada zolaqların üzərinə satış reklamı qoyulur, həm də prospekt boyunca avtomobillər dayanır. Bundan əlavə, bəzi avtosalonlar avtobus zolaqlarından parklanma yeri kimi istifadə edirlər. Oxşar vəziyyət Əhmədli metro stansiyası ətrafında, Məhəmməd Hadi küçəsində hökm sürür.
Bakı Nəqliyyat Agentliyinin mətbuat xidmətinin rəhbəri Mais Ağayevin sözlərinə görə, digər nəqliyyat vasitələrinin avtobus zolağı boyunca hərəkət etməsi və ya parklanması intervallarda ciddi ləngimələrə səbəb olur. Bundan da ən çox əziyyət çəkən sərnişinlərdir. Qurum rəsmisi deyir ki, problemin həlli üçün, xüsusilə pik saatlarında nəzarət gücləndirilməlidir.
Bakı şəhər Baş Polis İdarəsinin Dövlət Yol Polisi İdarəsinin rəsmisi Mübariz Ağayev isə bildirdi ki, qurum sözügedən məsələni həmişə diqqətdə saxlayır. Qaydaları pozan sürücülərə qarşı müntəzəm mübarizə tədbirləri görülür.
