Bakı Nəqliyyat Agentliyi tərəfindən paytaxt yollarında quraşdırılan intellektual monitorlar naməlum səbəbdən işləmir. Şəhərin bəzi ərazilərində bir neçə ay, bəzi ərazilərdə isə bir ildən artıqdır ki, tabloda sürücülərə heç bir məlumat verilmir. Bu haqda Xəzər TV reportaj hazırlayıb.
Məlumat lövhəsinin yerləşdiyi küçələrdən biri də Atatürk prospektidir. Prospektdə nəqliyyatın hərəkətinin sıx olduğuna baxmayaraq, insanları tıxaclardan xəbərdar etmək üçün nəzərdə tutulan lövhələr işləmir. İlk növbədə saatlarla tıxacda qalan sürücülər narahatçılıq yaşayırlar.
Nəqliyyatı İntelektual İdaretəmə Mərkəzi tərəfindən tənzimlənən lövhələrdə küçə və prospektlərdə sıxlıq olanda o istiqamətdə ox işarəsi qırmızı, nisəbətən açıq olanda sarı, yolda hərəkət sürəti normal olan küçə istiqamətində isə yaşıl işıq yanırdı. Həmin məlumatverici lövhələr quraşdırılmasında məqsəd günün istənilən vaxtında yollarda sıxlığın qarşısını almaq idi.
Bakı Nəqliyyat Agentliyindən verilən məlumata görə, hazırda Nəqliyyatı İntellektual İdarəetmə Mərkəzi yol polisinin balansındadır və həmin qurum layihəyə nəzarət edir.
Bakı Şəhər Dövlət Yol Polisi İdarəsinin baş inspektoru Araz Əsgərli bildirib ki, Nəqliyyatı Intellektual İdaretəmə Mərkəzinə bağlı olan infrastrukturun təhvil-təslim prosesi başa çatmadığı üçün sistemə tam texniki müdaxilə etmək səlahiyyəti formalaşmayıb. “Problemin aradan qaldırılması üçün zəruri addımların təhvil-təslim prosesindən sonra atılması mümkün olacaq”, - deyə idarənin baş inspektoru əlavə edib.
