Rəqəmsal İnkişaf və Nəqliyyat Nazirliyinin mətbuat xidməti Heydər Əliyev prospektində keçirilmiş etiraz aksiyasına münasibət bildirib. Bu haqda BakuPlus.az bu gün, 17 fevral tarixində xəbər verir.
“Mətbuatda yayılan məlumatlar həqiqətə uyğun deyil. Heç kim heç kimi işdən çıxarmayıb, heç kim xəbərdarlıq etməyib”, - deyə qurumdan bildirilib.
Dövlət Avtomobil Nəqliyyatı Xidməti də bu barədə açıqlama verib.
Məlumata əsasən, “İcazə” blanklarının alınması ilə bağlı ictimai qaydaları dəfələrlə pozan Rəmiş Cəfərov özünə əlavə imtiyazlar tələb edərək dövlət orqanını təhdid edib.
O, 2018-ci ildə lizinq müqaviləsi əsasında əldə etdiyi avtonəqliyyat vasitəsini qanunsuz yolla ölkədən çıxardığına görə, ona daşımalar üçün icazələrin verilməsi dayandırılıb və verilmiş icazələr etibarsız hesab edilib.
Bundan əlavə Rəmiş Cəfərov ona məxsus 99-XE-844/99-ZA-042 nömrəli nəqliyyat vasitəsi ilə 1 avqust 2018-ci il tarixində Türkiyə-Qazaxıstan marşrutunda beynəlxalq nümunəli əmtəə-nəqliyyat qaiməsində şirkətin kustar üsulla hazırlanmış saxta ştampından istifadə edib.
Nəticədə o, Türkiyədən Qazaxıstana daşıdığı yaş salfetka yükünü Gürcüstanda tütün məhsulları ilə əvəz edərək Rusiya Federasiyasının ərazisinə keçib və yükü naməlum şəxslərə təhvil verib.
Bu il isə Rəmiş Cəfərovun, icazəsi olmadan nəqliyyat vasitəsinin xarici ölkədən necə yüklənməsi sorğulanıb. Məsələyə aydınlıq gətirmək əvəzinə sürücü, nəqliyyat vasitələrini şəhərin mərkəzi prospektinin ikinci zolağında saxlayıb.
27 dekabr 2021-ci il tarixində Rəmiş Cəfərov qanunsuz əmələ yol verərək normal iş ahəngini pozması nəticəsində 15 sutka inzibati həbs cəzası alıb.
Rəmiş Cəfərov həm də 10 yanvar 2022-ci il tarixindən etibarən ABADA üzvlüyündən çıxarılmışdır.
