Sevdiyi qızı qaçırmaqda təqsirləndirilən İsgəndər İsgəndərov və tanışı Əlisaab Abdullayevin işi üzrə məhkəmə prosesi keçirilib.
Oxu.az xəbər verir ki, Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən prosesdə zərərçəkmiş və şahid dindirilib.
Şahid Əminə Məmmədova bildirib ki, təqsirləndirilən şəxslə iş yoldaşıdır və o, əvvəlcədən ona "sevdiyim qızı sizə gətirmək istəyirəm" deyib. Daha sonra qızı onun evinə gətirərək onunla ailə qurmaq istədiyini bildirib. Əminə Məmmədoa deyib ki, qızın üzərində xəsarət görməyib. O, onları evdə qoyaraq çıxıb və qapını bağlasa da, içəridən açmağın mümkün olduğunu qeyd edib.
Şahidin məhkəmədəki ifadəsi ilə istintaqdakı ifadəsi arasında ziddiyyət olduğu üçün onun istintaq dövründə verdiyi ifadəsi elan edilib. Şahid o zaman bildirib ki, onlar avtomobildən düşəndə qızla mübahisə etdiklərini görüb. Həmin vaxt qız onun əlindən tutaraq "ay mama, mənə kömək et" deyə kömək istəyib. İsgəndər isə bunu "qız naz edir" kimi izah edib.
Zərərçəkmiş də məhkəmədə ev sahibindən onu tək qoymamağı xahiş etdiyini deyib.
Məlum olub ki, tərəflər istintaq dövründə barışıblar və zərərçəkmiş şəxsin şikayəti yoxdur. Növbəti məhkəmə iclası mayın 8-nə təyin edilib. Cinayətləri sübuta yetirilsə, təqsirləndirilən şəxsləri 8 ildən 12 ilədək azadlıqdan məhrumetmə cəzası gözləyir.
