Abşeron Rayon Məhkəməsində qəsdən sağlamlığa az ağır zərər vurmada təqsirləndirilən Səmayə Həbibovanın (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Cəmilə Səfiyevanın sədrliyi ilə keçirilən prosesdə hökm oxunub.
Hadisə 21 dekabr 2024-cü il tarixində, gecə saatlarında Abşeron rayon ərazisində qeydə alınıb.
İttihama görə, Səmayə Həbibova kirayədə yaşadığı ünvanda qeyri-rəsmi münasibətdə olduğu zərərçəkmiş Faiq Həsənovla (adı, soyadı şərtidir) birgə spirtli içki qəbul edib, hər ikisi yüngül dərəcədə alkoqol sərxoşluğu vəziyyətində olublar. Gecə saat 05 radələrində zərərçəkmiş qadına intim münasibətdə olmaq istədiyini bildirib. Səmayə isə bununla razılaşmayaraq etiraz etdikdə tərəflər arasında mübahisə yaranıb.
Mübahisə zamanı təqsirləndirilən şəxs Faiqə hücum edərək əvvəlcə əlləri ilə onun boğazını sıxıb, sinəsindən itələyib. Bu zaman zərərçəkmişin kürək nahiyəsi stula çırpılıb. Daha sonra Səmayə masanın üzərindəki spirtli içki şüşəsini götürərək sevgilisinin baş nahiyəsinə vurub. Nəticədə zərərçəkmiş şəxsin başının sol təpə nahiyəsində əzilmiş-cırılmış yara, boyunun sağ yan səthində sıyrıqlar və bel nahiyəsində qançırlar yaranıb.
Hadisədən sonra Səmayə Həbibova saxlanılaraq cinayət məsuliyyətinə cəlb edilib.
Məhkəmənin hökmü ilə ona 1000 manat məbləğində cərimə cəzası təyin edilib.
