Bakının sahilyanı ərazilərində son illər müşahidə olunan yeraltı suların səthə çıxması halları sakinlər arasında ciddi narahatlıq doğurur.
Bakuplus.az xəbər verir ki, sosial şəbəkələrdə yayılan görüntülərdə problemin miqyası açıq şəkildə göstərilir.
Sakinlərin fikrincə, bu vəziyyətin əsas səbəblərindən biri dənizkənarı ərazilərdə yerləşən kiçik göllərin və təbii gölməçələrin qurudulmasıdır. Xüsusilə qamışlıq sahələrin məhv edilərək torpaqla doldurulması və həmin ərazilərdə fərdi yaşayış evləri, villaların tikilməsi təbii su balansını pozur.
Qeyd olunur ki, qamışlıqlar və gölməçələr illər boyu yeraltı suların səviyyəsini tənzimləyən təbii "süngər" rolunu oynayıb. Bu ərazilər yox edildikcə, sular yeni çıxış yolları axtarır və nəticədə çökək ərazilərdə – yaşayış həyətlərində, küçələrdə suyun səthə çıxması halları artır.
