“Qarabağ” FK Çempionlar Liqasına gedən yolda son rəqibi ilə qarşılaşacaq. Komandamızın Bakıda keçiriləcək matçına biletlər bir neçə saata bitib. İticket.az saytına eyni anda 100.000 nəfər daxil olub, kassalarda böyük sıralar yaranıb.
Həmçinn çoxlu sayda azarkeş paytaxtdakı müxtəlif məkanlara üz tutaraq, masalar rezerv edir. Hər kəs səbirsizliklə Çempionlar Liqasının himninin Bakıda oxunmasını gözləyir.
Vəziyyəti nəzərə aldıq və Bakuplus.az komandası olaraq araşdırma apardıq və oxucularımızın “Qarabağ” - “Viktoriya” oyununa rahat baxması üçün 6 məkan tapdıq.
“Sky Cinema”, Buzovna qəsəbəsi, “Delmar” oteli ərazisində yerləşən “Drive-in Cinema”-dır. Azarkeşlər şəxsi avtomobilinin içində oturaraq böyük ekranda oyuna baxa biləcəklər. Giriş pulsuzdur, qonaqlar üçün nəqliyyat vasitəsindən içki və qəlyanaltı sifariş etmək imkanı yaradılacaq.
Park Cinema və Cinema Plus kinoteatrlarında da komandamızın oyununu seyr edə bilərsiniz. Bakının ən böyük kinoteatr ekranında - Flame Towers filialında, eləcə də Amburan Mall-da matça baxmaq mümkün olacaq.
Bəs dəniz kənarında futbola nə deyirsiniz? “Sea Breeze Resort”-un böyük ekranında həm fan-zonadan ayaq üstə, həm də restoranın terrasından matça baxa bilərsiniz. Fan-zonaya giriş pulsuzdur. Restoranda 4 nəfərlik masa üçün depozit 100 AZN təşkil edir.
Əgər pivə bakalı arxasında oturub səs-küylü mühitdə futbola baxmaq istəyirsinizsə, “City Pub”-a müraciət edə bilərsiniz. Obyektdə ancaq ümumi zal mövcuddur və depozit yoxdur. Ünvan: Abdullah Şaiq küçəsi, 241.
Daha bir məkan “Krevetka Pub”-ın Bakıxanov filialıdır. Burada geniş zalda və ya şəxsi otaqlarda matça baxmaq mümkündür. Zal üçün depozit yoxdur, otaqlar üçün isə 100 AZN təşkil edir. Ünvan: Şamil Kamilov küçəsi, 15.
Əsl futbol azarkeşlərinin toplandığı məkanlardan biri - “BeerMood Baku”-da futbol həyəcanını yaşaya bilərsiniz. Buradakı atmosfer və mühiti unutmayacaqsınız. 8 nəfərlik otaqda depozit 200 AZN-dir, zalda isə depozit yoxdur. Ünvan: Əliyar Əliyev küçəsi, 69.
Rezerv etməyə tələsin!
