Şuşa və Ağdama səfər edən sərnişinlərin gəzməli olduğu yerlərin siyahısı açıqlanıb. Bu haqda bu gün, 24 yanvar tarixində Bakuplus məlumat verir.
Vətəndaşlar Şuşada Cıdır düzünü, Vaqif Məqbərə Muzeyi Kompleksini, Bülbülün ev-muzeyini, Yuxarı Gövxarağa məscidini, Aşağı Gövxarağa məscidini, Rayon İcra Hakimiyyətinin inzibati binasının qarşısındakı ərazini, “güllələnmiş büstləri”, Xurşidbanu Natəvan Muzey Evi, Xan Qızı bulağı və Şuşa qalasını ziyarət edəcəklər.
Ağdam şəhərində aşağıdakı istiqamətlər üzrə səfər nəzərdə tutulub: Pənahəli xanın “İmarət” saray kompleksi, Çörək muzeyi, Şəhidlər Xiyabanı, Dram Teatrı, Cümə məscidi, Qiyaslı məscidi və Şahbulaq qalası.
Hər bir marşrut üzrə müvafiq xüsusi nümayəndəliyin müşayiətçiləri və Dövlət Turizm Agentliyinin bələdçisi təyin edilib.
Bakı-Şuşa istiqamətində avtobuslar şənbə və bazar günləri, bazar ertəsi və cümə axşamı Bakı-Ağdam istiqamətində hərəkət edir.
Şuşaya 400-ə yaxın bilet satılıb, və fevralın 15-dək sözügedən istiqamətdə bütün reyslərə bilet satışı tamamlanıb. Bakı-Ağdam-Bakı marşrutu üzrə isə bilet satışı bir qədər zəifdir. Sərnişinlər bir gün sonra yerinə yetiriləcək reyslərə bilet ala bilərlər.
