Paytaxtın Qaradağ rayonu, Qızıldaş qəsəbəsində yaşayış binaları qəzalı vəziyyətdədir. Bu haqda bu gün, 1 aprel tarixində Bakuplus.az Real TV-yə istinadən xəbər verir.
Fin evlərində yaşayan sakinlər təhlükədə olduqlarını bildirirlər. Tavan hər an uça bilər, gəmiricilər binada yuva salıb.
“İstəyir bələdiyyəsi olsun, istəyir icrası olsun, heç kim bura ilə maraqlanmır ki, burada 8 ailənin yaşaması necədir”, - deyə sakinlərdən biri qeyd edir.
Bundan əlavə, ərazidə infrastruktur da mövcud deyil. Torpaqlı, palçıqlı yollar yaşayışa çətinlik yaradır. Həmçinin qəsəbədə uşaq bağçası yoxdur. Valideynlər övladlarını qonşu qəsəbəyə aparmağa məcbur olurlar.
İcra Hakimiyyətindən məsələdən xəbərdar olduqlarını və artıq müvafiq göstəriş verildiyini söyləyiblər. Digər rəsmi qurumlar da infrastrukturun yenidən qurulacağını bildiriblər.
