Bakı şəhəri, Qaradağ rayonu ərazisində Abşeron Logistika Mərkəzinin yeni layihəsi olan Abşeron Biznes Parkı açılıb. Bu haqda bu gün, 12 noyabr tarixində məlum olub.
Biznes parkının ərazisində biznesin bir çox sahələrinin inkişafı üçün lazımi infrastruktur yaradılıb. Burada sahibkarlara sexlərin və istehsalat sahələrinin yaradılması, məhsulların ərazidə birbaşa satışı, eləcə də müxtəlif kateqoriyalı malların açıq anbarlarda saxlanması kimi xidmətlər təklif olunur.
Parkın təsisçiləri sahibkarlara xüsusi şərait, 24 saat müşahidə kameraları və yanğından mühafizə vəd edir.
Parkın Abşeron Tikinti Materialları Mərkəzi, Mevəli, Sədərək və Binə ticarət mərkəzlərinə yaxın yerləşməsi, yük zonasında sərgi salonlarının (“showroom”) yaradılması imkanları, eləcə də şəhərdən kənarda rahat nəqliyyat əlaqələrinin olması sahibkarlar üçün rahat biznes mühiti yaradır. Eyni zamanda, yüklərin birbaşa Abşeron yük stansiyasına çatdırılması imkanları sahibkarları əlavə loqistika xərclərindən azad edir.
