Bakı Nəqliyyat Agentliyi (BNA) və Baş Dövlət Yol Polisi İdarəsi (BDYPİ)yanvarın 8-dən 12-nə kimi ölkə ərazisində gözlənilən hava şəraitinin dəyişəcəyini nəzərə alaraq, hərəkət iştirakçılarını yollarda diqqətli olmağa çağırıb.
BNA sürücüləri qarlı-buzlu hava şəraitində hərəkətdə olarkən sürət həddinə və yol nişanlarının tələblərinə əməl etməyə çağırır. "Sürücülər sürət həddinə əməl etməklə yanaşı, meteoroloji amilləri nəzərə alsınlar və digər hərəkət iştirakçılarına qarşı anlayışla davransınlar. Ümumilikdə isə kəskin hava şəraitinin davam etdiyi günlərdə ictimai nəqliyyatdan istifadəyə üstünlük verilməsini tövsiyə edirik", - məlumatda deyilir.
BDYPİ əlverişsiz şəraitlə əlaqədar olaraq, avtomobilləri qış təkərləri olmadan idarə etməməyi tövsiyə edir. Qurum küləkli hava ilə əlaqədar park yerlərinə diqqət yetirməyə və avtomobillərini ağacların, iri reklam lövhələrinin, aşma yaxud qopma ehtimalı olan digər əşyaların yaxınlığında və ya atında saxlamamağı, meteoroloji şəraitə uyğun sürət həddi seçməyi, nəqliyyat vasitələrinin şüşəyuyanları və şüşəsilgəclərinin müəyyən edilmiş rejimdə işləməsini yoxlamağı, həmçinin zərurət olmadan yollarda qəfil manevrlər və kəskin tormozlama hərəkətləri etməməyi xahiş edib.
