Vətən müharibəsi qazilərinə qarşı dələduzluq edən kanal rəhbərinin məhkəməsi başlayır. Bu haqda 12 mart tarixində Report məlumat yayıb.
“Bəyaz TV” Youtube kanalının rəhbəri Bəhram Rüstəmov ayrı-ayrı vətəndaşlara qarşı hədə-qorxu gəlib və onlardan pul tələb edib. O, Samux rayonunda təhsil müəssisələrində guya baş verən qanunsuzluqlarla bağlı yalan məlumatları internetdə yerləşdirib yayacağı hədəsi ilə rəhbərlikdən pul alıb.
Həmçinin B. Rüstəmov dələduzluq yolu ilə Bakıda Vətən müharibəsi iştirakçılarından pul alaraq mənimsəyib. Məlum olub ki, o, qazilərə ev və avtomobil növbəsinə qeydiyyata salınmaq üçün kömək edəcəyi barədə yalandan vədlər verib və bu əmələ görə onlardan pul alıb. Eləcə də digər vətəndaşdan həbsdə olan tanışının məsuliyyətdən azad olunmasına köməklik göstərilməsi adı ilə müxtəlif məbləğlərdə pul götürüb.
Bəhram Rüstəmov saxlanılıb və Cinayət Məcəlləsinin “Şəxs tərəfindən öz qulluq mövqeyindən istifadə etməklə təkrar törədilən dələduzluq”, “Təkrar hədə-qorxu ilə tələb etmə”, “Rüşvət verməyə təhrik etmə” maddələri ilə təqsirləndirilib. Onun barəsində məhkəmənin qərarı ilə həbs qətimkan tədbiri seçilib.
İş baxılması üçün Gəncə Ağır Cinayətlər Məhkəməsinə göndərilib. İş hakim Nural Əliyevin sədrliyi ilə araşdırılacaq. Məhkəmənin hazırlıq iclası martın 29-na təyin edilib.
