Bakıda tibb müəssisəsində işçini döyən şəxsə hökm oxunub. Bu haqda bu gün, 2 mart tarixində Bakuplus.az Qafqazinfo-ya istinadən xəbər verir.
Dövlət Tibbi-Sosial Ekspertiza və Reabilitasiya Agentliyinin əməkdaşı, qazi Namiq Babayevə iş vaxtı xəsarət yetirən idmançı Rəvan Nəbizadənin məhkəməsi başa çatıb. Son iclas Binəqədi Rayon Məhkəməsində keçirilib. Burada təqsirləndirilən şəxsə hökm oxunub.
Hakim onun həbsinə zərurət görməyib. Qərara əsasən, Nəbizadəyə 3 il 1 ay müddətinə azadlığın məhdudlaşdırılması (elektron qolbaq) cəzası verilib. Onun üzərinə yaşadığı ünvanı axşam saat 22:00-dan səhər 07:00-dək tərk etməmək, elektron nəzarət vasitəsini işlək vəziyyətdə gəzdirmək öhdəliyi qoyulub.
Hadisə 6 may 2023-cü il tarixində baş vermişdi. Sağlamlığı qaydasında olmasına baxmayaraq, əlillik dərəcəsi almaq üçün komissiyaya gələn Rəvan Nəbizadə müayinəyə növbədənkənar daxil olmağa cəhd edib. Babayev onu sakitləşdirmək üçün yaxınlaşaraq izahat verən zaman Nəbizadə ona yumruq zərbələri ilə ağır bədən xəsarəti yetirib. Nəticədə sonuncunun çənə sümüyü sınıb, dişləri qırılıb.
