Respublikanın tanınmış alimi vəfat edib. Bu haqda bu gün, 28 fevral tarixində Bakuplus.az universitetin mətbuat xidmətinə istinadən xəbər verir.
Azərbaycan Memarlıq və İnşaat Universitetinin Fizika kafedrasının sabiq müdiri, fizika-riyaziyyat elmləri doktoru professor Tahir Pənahov 88 yaşında dünyasını dəyişib.
Tahir Pənəhov 10 iyun 1936-cı ildə anadan olub. Alim Azərbaycan Dövlət Pedaqoji Universitetində təhsilini (ADPU) 1960-cı ildə müvəffəqiyyətlə başa vuraraq Politexnik İnstitutunun Fizika kafedrasında baş laborant kimi fəaliyyətə başlayıb. 1989-cu ildə isə o, professor elmi adını alıb.
Onun AzMİU-da "Metal və ərintilər fizikası" Elmi-təqiqat Laboratoriyasının açılmasında təşəbbüsü olub. Alimin təklifi ilə universitetdə "Metallar fizikası" istiqamətində ixtisas açılıb. Daha sonra "Metallar fizikası" sahəsi üzrə məktəb yaradılıb.
Tahir Pənahov Zabrat Oksigen Zavodunda böyük laboratoriya işə salıb, laboratoriyanı müasir avadanlıqlarla təchiz edib, cihazların işləmə qaydalarını hazırlayıb və kadrla təmin edib.
Alim 60-dan çox beynəlxalq və respublika elmi konfransında məruzələrlə çıxış edib, 20-dən çox müəlliflik şəhadətnaməsi və patentin, ixtiranın, 360-dan çox elmi məqalənin, 15 monoqrafiya, dərs vəsaiti və metodiki vəsaitin müəllifidir. O, həmçinin istehsalatla bağlı 18 elmi-tədqiqat işi tövsiyə edib. Alim arqon qazının qarışıq qazlardan ibarət daha keyfiyyətli arqomiks qazı qaynaq istehsalında tətbiq edib, yeni ixtira kimi patent alıb. O, metal və ərintilər sahəsində yeni istiqamət yaratmış Azərbaycanın əsas alimlərindən biridir.
