Avtomobil parklanmalarında qiymətlərdə güzəştlər ola bilərmi? Bu haqda bu gün, 3 fevral tarixində Bakuplus.az ARB-yə istinadən xəbər verir.
Sürücülər iş yerinin yaxınlığında avtomobil saxlayan zaman gündəlik 3-10 AZN arası ödəniş etməli olurlar. Bu da onların cibinə ciddi təsir edir. 8-9 saat avtomobillərini saxlayan şəxslər üçün parklanma qiymətləri aşağı salına bilərmi?
Nəqliyyat Məsələləri üzrə ekspert Rauf Ağamirzəyev hesab edir ki, sürücülərə güzəşt edilməsi məqsədəuyğun deyil:
“Siz səfərinizi nə ilə təşkil edirsiz, bu, artıq sizin seçiminizdir. Avtomobil özü xərclidir və onun parking xərcləri də sizin prioritetinizə təsir edir. Həmin insanlar ictimai nəqliyyatla da hərəkət edə bilərlər”, - deyə o qeyd edib.
Digər tərəfdən isə ictimai nəqliyyatın düzgün təşkil olunmadığı vurğulanır.
“Avtobus parklarını müasir tələblər səviyyəsində qurmaq lazımdır. Metrolarda məsafələri azaltmaq lazımdır. Bu rahatlıqlar olarsa, təbii ki, insanlar avtomobillərini istədiyi yerdə saxlayıb ictimai nəqliyyatla gedərlər”, - deyə deputat Fəzail Ağamalı bildirib.
Azərbaycan Yerüstü Nəqliyyat Agentliyindən məsələ ilə bağlı bildirilib ki, parklanmaya görə iş yerlərinə, təhsil müəssisələrinə münasibətdə və digər hallarda güzəşt nəzərdə tutulmayıb.
