Paytaxt ərazisində avtomobillə piyadanı vuraraq öldürən şəxsə hökm oxunub. Bu haqda bu gün, 13 may tarixində Bakuplus.az Unikal.az-a istinadən xəbər verir.
Bakı Ağır Cinayətlər Məhkəməsinin hakimi Fərid Namazovun qərarına əsasən, Təhminə Həsənova 5 il müddətinə azadlıqdan məhrum edilib.
Hadisə ötən ilin iyununda paytaxtın Sabunçu rayonu, Bakıxanov qəsəbəsində baş verib.
29 yaşlı Təhminə Həsənova “Hyundai İ30” markalı avtomobillə Bəşir Bünyadov küçəsində yerləşən 84 nömrəli tam orta məktəbin qarşısında hərəkətdə olan zaman yolu keçən piyada, 59 yaşlı Suliddin Hüseynovu vurub. Məhkəmə ekspertizası zamanı T.Həsənovanın avtomobili içkili vəziyyətdə idarə etdiyi məlum olub.
T.Həsənovaya qarşı Cinayət Məcəlləsinin “Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma, eyni əməllər ehtiyatsızlıqdan zərərçəkmiş şəxsin ölümünə səbəb olduqda” maddəsi ilə ittiham irəli sürülüb.
