"Nəsiminin mərkəzdən ayrılmasından sonra belə iddialar yayıldı ki, guya mərkəz bizim üzərimizdən oyun qurur və pul qazanır. Açığı, bir pasiyent kimi həmin ittihamları gülməli sayıram".
Bunu yenisabah.аz-a açıqlamasında dörd aydır "Qurtuluş" Reabilitasiya Mərkəzində müalicə olunan Azərbaycanın Milli Qəhrəmanı, şəhid Salatın Əsgərovanın oğlu, jurnalist Ceyhun Əsgərov deyib.
Ceyhun Əsgərov məşhur jurnalist Nəsimi Nəbizadənin reabilitasiya mərkəzindən qaçmasından da danışıb: "Müalicəni dayandırmaq qərarını Nəsimi özü verdi. Heç kim onu buna məcbur etməyib. Bu qərar nə mənə, nə mərkəzə, nə sizə ziyan vurur. Ziyan görən yalnız onu sevənlər və ən əsası, özüdür. Əgər əvvəlki həyat tərzinə qayıdacaqsa, bunun ən ağır nəticəsini də yenə özü yaşayacaq".
Qeyd edək ki, Nəsimi Nəbizadə və Ceyhun Əsgərov ötən ilin sentyabrında "Qurtuluş" Reabilitasiya Mərkəzinə yerləşdirilmişdi.
