Türkiyə Prezidenti Rəcəb Tayyip Ərdoğan azərbaycanlı yazıçını mükafatlandırıb. Bu haqda bu gün, 3 dekabr tarixində Bakuplus.az Report-a istinadən xəbər verir.
Yazıçı Elçin Əfəndiyevə ədəbiyyat sahəsindəki nailiyyətlərinə görə “Necip Fazil” mükafatı təqdim olunub. Mükafatlandırmada Rəcəb Tayyip Ərdoğan şəxsən iştirak edib.
“Bu mükafatın Türkiyə-Azərbaycan dostluğu və həmrəyliyinin dünyada örnək olduğu bir zamanda verilməsinin fərqli bir mənası var. Əfəndiyev qardaşımızın əsərləri və varlığı ilə bu dostluğun mədəniyyət və elm sahələrində bayraqdarlarından biri olmağına davam edəcəyinə inanır, onu təbrik edirəm”, - deyə Türkiyə Prezidenti bildirib.
Elçin Əfəndiyev 1943-cü ildə Bakıda anadan olub. O, Bakı Dövlət Universitetinin filologiya fakültəsini, Azərbaycan Elmlər Akademiyası Nizami adına Ədəbiyyat İnstitutunun ədəbiyyat nəzəriyyəsi üzrə aspiranturasını bitirib.
