"Trendyol" əmtəə nişanından istifadə etmənin qarşısının alınması və kompensasiya ödənilməsi tələbi ilə məhkəməyə müraciət edib.
Teleqraf.az xəbər verir ki, iddiaçı cavabdeh qismində Bakının Maştağa qəsəbəsində fəaliyyət göstərən "Brendyol"u göstərib.
İddia ərizəsində qeyd edilib ki, Azərbaycan ərazisində qorunan "Trendyol" əmtəə nişanına oxşar "Brendyol" söz nişanı və ya onlara qarışdırılacaq dərəcədə oxşar hər hansı digər əmtəə nişanlarından istifadə cavabdehə qadağan olunmalıdır. Eyni zamanda iddia tələbində Bakının Sabunçu rayonu, Maştağa qəsəbəsində yerləşən mağazanın girişindən, reklam lövhələrindən "Brendyol" söz nişanının sökülməsi, o cümlədən, "İnstagram", "TikTok"da və "Google Maps"da (Google Xəritələr) cavabdehin mağazasına aid səhifələrdə oxşar əmtəə nişanlarının yığışdırılması qeyd olunub.
Bundan başqa, "Trendyol" vurulmuş ziyanın və çəkdiyi xərclərin əvəzinə 50 000 manat kompensasiya tələb edib.
Bakı Kommersiya Məhkəməsi "Trendyol"un iddiasını qismən təmin edib. Qərara əsasən, "Trendyol" əmtəə nişanına qarışdırılacaq dərəcədə oxşar "Brendyol" söz nişanından istifadə cavabdehə qadağan olunub. Vurulmuş ziyan və çəkdiyi xərclərin əvəzində isə "Brendyol" "Trendyol"a 7 000 manat kompensasiya veriləcək.
