Bakı Ağır Cinayətlər Məhkəməsində Ukrayna vətəndaşı Fatıma Bairamovaya hökm oxunub.
Teleqraf.az xəbər verir ki, ittihama görə, 28 yaşlı Fatıma Bairamova Xəzər rayonu, Binə qəsəbəsində yerləşən evdə müvəqqəti yaşayan və üç il əvvəl tanış olduğu Mirzəağa adlı şəxslə mübahisə edib. O, zərərçəkmişə hamilə qaldığını dedikdən sonra qarşı tərəfin uşağın ondan olmadığını bildirməsi, onunla münasibəti kəsmək istəməsi səbəbindən mübahisə böyüyüb.
Fatıma Bairamova Mirzəağanı cəzalandırmaq niyyəti ilə onun yaşadığı evə gəlib, dolabda gizlənib. Zərərçəkmiş şəxs otağa daxil olduqdan sonra isə bıçaqla onun döş nahiyəsindən bir dəfə zərbə endirib.
Bakı Ağır Cinayətlər Məhkəməsinin hökmü ilə Fatıma Bairamova 3 il müddətinə azadlıqdan məhrum etmə cəzasına məhkum edilib.
Məhkəmə Cinayət Məcəlləsinin müvafiq maddəsini tətbiq edərək 1 il sınaq müddəti olmaqla cəzanı şərti sayıb.
