Cari ilin yanvar ayında paytaxtın Nizami rayonunda yerləşən 8-ci kilometr bazarında (“Vosmoy”) həyat yoldaşını öldürməyə cəhd edən kişiyə hökm oxunub. Bu haqda bu gün, 24 noyabr tarixində Bakuplus.az Baku.ws-ə istinadən məlumat verir.
Bakı Ağır Cinayətlər Məhkəməsində keçirilən prosesdə 36 yaşlı Pənah Şükürov əməldə təqsirli bilinib. Ona 11 il 3 ay həbs cəzası verilib.
Hadisə qısqanclıq zəminində baş verib. Bazarda satıcı işləyən arvadı, 32 yaşlı A. Şükürovanı qısqanan əri onun iş yerinə gələrək qadına hücum edib. O, qadının boğazını kəsərək onu öldürmək istəyib.
Bu zaman arxası üstə yıxılan qadın müqavimət göstərib, dizlərini boğazına sıxıb və ərinin onu öldürməsinə imkan verməyib. Qadın diz, bud, sağrı və əl nahiyələrindən bir neçə xəsarət alıb. Hadisə zamanı bazarda olanlar Pənahı dəmirlə vuraraq arvadının yanından uzaqlaşdırıblar.
