Paytaxtın Xətai rayonu, Afiyəddin Cəlilov küçəsində köhnə asfalt qatının qaşınması yekunlaşıb. Bu haqda bu gün, 26 iyun tarixində Bakuplus.az Azərbaycan Avtomobil Yolları Dövlət Agentliyinə (AAYDA) istinadən məlumat verir.
Hazırda yeni asfalt-beton örtüyünün döşənməsi üçün hazırlıq aparılır.
İki gün ərzində bağlanan yol 8 Noyabr prospektində tıxacların əmələ gəlməsinə səbəb olub. AAYDA-nın mətbuat katibi Anar Nəcəflinin sözlərinə görə, uzun müddət təmir olunmadığından yolun əsaslı təmirə bağlanması zərurəti yaranıb. Aparılan təmir işlərinin qısa müddət ərzində yekunlaşdırılması nəzərdə tutulur. Bunun üçün əraziyə lazımi sayda qüvvə cəlb edilib.
Sürücülərdən aparılan işlərə anlayışla yanaşmaları, təmir müddətində sözügedən hissələrdə hərəkətdə olarkən diqqətli olmaları, təmir ərazilərində qoyulacaq müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur.
