Bakı şəhəri, Xəzər rayonunun Zirə, Pirallahı rayonunun Pirallahı və Gürgan və Suraxanı rayonunun Zığ qəsəbələrində təhlükəsizlik qaydalarını pozan mühərrikli qayıq istifadəçiləri cərimələnib. Bu haqda bu gün, 24 fevral tarixində Fövqəladə Hallar Nazirliyinin (FHN) mətbuat xidməti məlumat verib.
Bildirilib ki, 12 ədəd mühərrikli qayıq saxlanılıb, sürücülük vəsiqələri yoxlanılıb.
Kiçikhəcmli gəmilərin təhlükəsiz istismarı qaydalarının müvafiq tələblərini pozan (görmə məsafəsi məhdud olduğu hallarda günün qaranlıq vaxtı idarəetmə, sürücülük hüququ olmadan kiçikhəcmli gəmilərin istismarı, xilasetmə və digər təchizat avadanlıqları olmadan qayıqlardan istifadə, bort nömrəsinin olmaması) 5 gəmi istifadəçisi barəsində protokol tərtib edilib.
Eyni zamanda, kiçikhəcmli gəmilərin qanunvericiliyə uyğun olaraq dövlət qeydiyyatına alınması və texniki müayinədən keçirilməsinin, habelə gəmi sürücüləri tərəfindən sürücülük vəsiqələrinin verilməsinin vacibliyi gəmi sahiblərinə izah edilib, onlarla maarifləndirici söhbətlər aparılıb.
