Azərbaycanın Xalq artisti Ənvər Həsənov xəstəxanaya yerləşdirilib. Bu haqda bu gün, 29 avqust tarixində Report-a istinadən Bakuplus.az məlumat verir.
Aktyorun qızı Aytən Həsənovanın sözlərinə görə, artistin vəziyyəti ağırdır: "Hazırda xəstəxanadayıq. Müayinələr, hələ ki, tam bitməyib. Atamı xəstəxanaya orta-ağır vəziyyətdə gətirmişik".
Ənvər Həsənov 1950-ci ildə Bakıda anadan olub. O, gənc yaşlarından kinolara çəkilməyə başlayıb. Xüsusilə "Yeddi oğul istərəm" filmində Cəlal, "Dərviş Parisi partladır" filmində Şahbaz, "Babək" filmində Tərxan, "Atları yəhərləyin" filmində Sirac, "Uşaqlığın son gecəsi" filmində Murad və başqa maraqlı obrazlar yaratmışdır. Ənvər Həsənov aktyor, rejissor və ya rejissor assistenti kimi, ümumilikdə 50-yə yaxın filmin çəkilişində iştirak edib.
