Bu gün, fevralın 21-də Xalq rəssamı Böyükağa Mirzəzadənin anadan olduğu gündür.
Böyükağa Mirzəzadə 1921-ci ildə Bakıda anadan olub. O, erkən yaşlarında Əzim Əzimzadə adına Rəssamlıq Məktəbinə daxil olub.
Sənətkarın gənclik illərində rəngkarlıq, qrafika rəssamlığı və digər janrlarda müxtəlif mövzularda yaratdığı əsərlər qiymətli sənət nümunələri kimi rəssamlıq tarixinə daxil olub.
Rəssam 1940-cı ildən etibarən yerli və beynəlxalq sərgilərdə fəal iştirak edib. B.Mirzəzadə keçmiş Çexoslovakiya, həmçinin Fransa, İtaliya və digər xarici ölkələrdə yaradıcılıq ezamiyyətlərində olub. Rəssamın xaricdə və ölkəmizdə bir çox fərdi sərgiləri təşkil edilib. Onun əsərləri ölkəmizlə yanaşı, bir çox xarici ölkələrin muzey, qalereya və şəxsi kolleksiyalarında saxlanılır.
Xalq rəssamı “Mənim günahım” pyesinə, “Qayınana”, “Bayadera” musiqili komediyalarına bədii tərtibat verib.
B.Mirzəzadə Azərbaycan SSR-nin Əməkdar incəsənət xadimi, Üzeyir Hacıbəylı adına Dövlət mükafatına və Xalq rəssamı fəxri adına layiq görülüb.
Böyükağa Mirzəzadə 2007-ci ildə 86 yaşında vəfat edib.
