Bakının Səbail rayonunda yerləşən Xaqani bağının (“Molokan” bağı) yenidən qurulması istiqamətində fəal işlər davam etdirilir. Bu haqda bu gün, 16 iyul tarixində Bakuplus.az “Transport for Baku” Facebook səhifəsinə istinadən məlumat verir.
Hazırda bağın ərazisinin genişləndirilməsi çərçivəsində burada kiçik memarlıq formaları yaradılır, yeni ağaclar, kollar və güllər əkilir.
Daha öncə məlum olub ki, parkın və ona bitişik evlərin abadlaşdırılması üzrə xüsusi plana əsasən, bağın sahəsi bitişik yollar hesabına artırılacaq. Avtomobil yollarında piyadalar üçün infrastruktur yaradılacaq. Bundan əlavə, parkın yaşıllıq sahəsinin xeyli artırılması nəzərdə tutulur.
Uşaq bağçasının işıqlandırma sistemi tamamilə dəyişəcək. İşlər bitdikdən sonra bütün bağ sahəsi istifadə üçün piyadaların ixtiyarına veriləcək.
