Bakuplus.az yüksək keyfiyyətli dizelin satışı ilə məşğul olan məntəqə haqda məlumat toplayıb.
Bildiyiniz kimi, respublika ərazisində satışda olan dizel yanacağı “Avro-4” standartındadır. Bu da yeni nəsil avtomobillərin mühərriklərinə mənfi təsir göstərir. Onların yanacaq sistemlərində problemlər ortaya çıxır. Belə şəraitdə işləyən mühərriklərin tam işçi həcmlərinə uyğun istismarı mümkünsüz olur. Minik və iritonnajlı yük maşınlarının sürücüləri aşırımlarda dartı qüvvəsinin (tyaqa) az olmasına görə çətinlik çəkirlər.
Son günlər müxtəlif forumlarda Azərbaycanda “Avro-5” standartına uyğun olan dizel yanacağının satışı məntəqəsinin mövcud olması müzakirə mövzusuna çevrilib.
Məlum olub ki, həqiqətən, bu cür yanacaq satan məntəqə var. Əməkdaşlarımız həmin yeri Sahil qəsəbəsinin kənarında aşkar ediblər. Yanacaqdoldurma məntəqəsi “Holcim” Qaradağ Sement zavodunun yaxınlığında yerləşir.
Ərazidə iri müəssisələr mövcuddur. Bir çoxunda isə yeni nəsil iritonnajlı yük maşınları istismar edilir. Buna görə orada fəaliyyət göstərən logistika şirkətlərindən biri özü yüksək keyfiyyətli dizelin istehsalına başlayıb. Məhsul bütün nəqliyyat vasitələri üçün standart qiymətə - 1 litri 0.80 manata satılır.
Məsələ ilə bağlı minik maşınlarının sürücülərinin fikirlərini öyrəndik. Onların sözlərinə görə, avtomobillərin yanacaq sərfiyyatı enib, mühərriklərdə titrəmə və səslər azalıb.
Bəzi maşın sahibləri isə dəyişikliklərin yaxşıya doğru olduğunu desələr də, fərqi gözəçarpan dərəcədə hiss etmədiklərini söyləyiblər.
Qeyd edək ki, Neft Emalı Zavodu bu ilin üçüncü rübündə Azərbaycanda “Avro-5” standartlarına uyğun dizelin istehsalına başlamağı planlaşdırır. Bununla da sözügedən yanacağın keyfiyyəti ilə bağlı yaşanan çətinliyin aradan qaldırılması gözlənilir.
[video width="1080" height="1080" mp4="https://bakuplus.az/storage/photos/2022/08/versiya-3-kvadrat01.mp4"][/video]
