Yasamal gölünün qurudulması ilə bağlı sosial şəbəkələrdə iddialar səsləndirilib. Bu haqda bu gün, 20 fevral tarixində Bakuplus.az Qafqazinfo-ya istinadən xəbər verir.
Son günlər kütləvi informasiya vasitələrində Yasamal gölünün qurudulması ilə bağlı bir sıra məlumatlar yayılıb. Ərazidə tikinti işləri aparan “Kristal Abşeron” şirkəti məsələ ilə bağlı açıqlama verib.
Bildirilib ki, həmin məlumatlar həqiqəti əks etdirmir. Sözügedən videodakı ərazi isə gölətrafı bulvar salınması üçün ayrılmış zonadır.
“Bu hissədə heç bir bina tikintisi nəzərdə tutulmur. Ərazidə aparılan prosesin məqsədi gölü qurutmaq yox, sadəcə onun səth hissəsində bərkitmə işləri aparmaqdır. Bu proses yekunlaşdıqdan sonra gölətrafı bulvar ərazisinin salınmasına başlanılacaq”, – deyə şirkət tərəfindən məlumat verilib.
Həmçinin bildirilib ki, baş plan Dövlət Ekoloji Ekspertiza Agentliyi tərəfindən qiymətləndirilib. Layihənin tullantıların idarə olunması, texniki və içməli suya qənaət edilməsi kimi məsələlərə müsbət yöndə təsir edəcəyi qənaətinə gəlinib və icra üçün razılıq verilib.
“Kristal Abşeron” şirkəti tikinti aparan zaman həmin ərazidəki mövcud yaşıllığı landşaft elementi olaraq saxlayacağını və yeni yaşıl ərazilər salaraq ekoloji sağlam mühit yaradacağını əlavə edib. Ərazidə 5 hektarlıq şamlıq parkının salınması nəzərdə tutulub.
