Bakının Yasamal rayonu, Moskva prospekti, 8 ünvanında aparılan tikinti işləri sakinlərin narazılığına səbəb olub. Bu haqda bu gün, 30 noyabr tarixində Baku.ws məlumat verib.
Sakinlər iddia edirlər ki, aparılan tikinti işləri zamanı onların avtomobillərinə maddi ziyan vurulub. Həmçinin inşaat avadanlıqları həm avtomobillərin, həm də piyadaların hərəkətinə çətinlik yaradır.
"Tikinti gecə də, səhər də davam edir. Oyanıb görürük ki, maşınlarımızın üstü toz, çınqıl və başqa tikinti materiallarının zir-zibili ilə çirklənib. Bir maşını təmizləməyə də azı 100 manat pul lazımdır. Bizə dəyən ziyanı kim ödəməlidir? Heç bilinmir, aparılan tikinti qanunidir, ya qanunuz?" - deyə sakinlər öz narazılığını bildiriblər.
Əraziyə cəlb olunan Fövqəladə Hallar Nazirliyinin (FHN) əməkdaşları yoxlamalar apararaq rəy bildiriblər: “FHN-in Tikintidə Təhlükəsizliyə Nəzarət Dövlət Agentliyinin mütəxəssisləri tərəfindən “Yeni İnşaat 2017” MMC tərəfindən aparılan tikinti gedən əraziyə baxış keçirilib. İlkin araşdırma nəticəsində qayda pozuntuları aşkar edilib və bu səbəbdən agentlik tərəfindən tikinti işləri dayandırılıb. Əlavə müvafiq tədbirlər görüləcək".
